زوبرمان- فوق ال 18 لو سمحتو
Posted by: Amr Abu-Hmeidan | 07/16/2006, 15:34- أنا ما عندي كلسون أحمر ... و لنفرظ أنّو عندي... عمري ما لبستو فوق البنطلون (إلاّ إذا في صور تثبت هالحكي)... طبعاً أنا بعذر زوبرمان لأنو تخيّل حالك بتغيّر أواعيك في كابينة ألو و أنت مستعجل...100% راح تلبس الشو أسمو فوق البنطلون...
- أي نعم أنا عندي حاسة شم خارقة... بس هاظي الحاسة... قادرة على تحديد... الروائح النسائية و ريحة الطبيخ... و غير هيك يا خوك ما بلقط...
- أكيد أنا معروف بقدرتي على حل المشاكل باصبع رجلى الزَغير "يعني بسهولة" بس هاظي المشاكل ما بتتطلّب مجهود بدني... يعني بالعقل... و حتى هاظي بطّلناها من زمان عشان العالم ما تزعل و يقولوا... عنّي "أبو العرّيف"...
ملاحظة:للتمتّع بهذا البوست للدرجة القصوى يرجى قراءته بالكامل باللهجة الأردنيّة القحّة...
ولك شو هالحكي هاظ.... عيب...ششش...ولك فظحتنا... بدنا نسكّرلك البلوغ تبعك...خلص بكفّي سفالة...
تشأ... ولك اسمعني....انت فهمت غلط...أنا بحكي عن هاظ النشمي الّلي حاط بشكير احمر عظهروه... يا زلمة هاظ الّلي بلبس طايط أزرق و جزمة حمرا و بغيّر أواعيه في كابينة الألو... زوبرمان يا زلمة ،ول ما عرفته؟
طبعاً هاي البوست تم نشرها لدحض عدد من الادعاءات و الأفكار غير الصحيحة المشروحه أدناه:
أولاً: بعظ الناس بقول أنّي أنا مفكّر حالي زوبرمان... و هاظا الحكي كلّو كذب...و بقدر أثبت الحكي هاظ من الدلائل و الفروق التالية:
طبعاً في فروق كثير بيني و بين الأخ... بس أنا رح أكتفي بهذا المقدار... و الّلي حاب يعرف أكثر يسأل...
ثانياً: الشعب الأمريكي يظن أنّ زوبرمان... مخلوق خارق جاء من كوكب كريبتون و استقر في الولايات المتحدة و نقطة ظعفه الوحيدة هي مادة الكريبتونايت و كما ورد من مصادر موثوقة جدّاً هاظا الحكي مش صحيح كما يوظّح المصدر الموثوق:
أنّو زوبرمان عبارة عن انسان عادي من مدينة "الكرك" هيك بنعرف من وين جابو كلمة كريبتونايت... لاحظتو... "كرك" / " كريبتونايت" بالإعادة البطيئة ... أكيد شوفتو الشبه... و نقطة ظعفه الوحيدة كانت الجميد... و أنّو هاظ الزلمة انتقل في فترة الستينات إلى المديينة عمّان و بالذات إلى منطقة المهاجرين... و كان يشتغل في ملحمة الصبح و من هون جاب الجزمة الحمرة... و المسويّات كان يمسح قزاز السيّارات و من هون جاب البشكير الأحمر... طبعاً قواه الخارقة كسبها من العيشة في المهاجرين... و زيّوه زي أي قروي انبهر زوبرمان بأظواء المديينة عمّان... و خلال كفاحه و سعيه للحصول على ما يحصل عليه أهل المديينة... اتجه اتجاه خاطيء... و صار أزعر ... و خطر على كل مواطن في عمّان... فقرّرت أمانة عمّان تخلص منّه... و دبّرتلوه فيسا لأميركا... قالوا بظيع بين هالهمل في مدينة من هالمدن الكَبيرة... المهم راح زوبرمان عأميركا و هناك... استغل كثير من قدراته... في دب الذعر في قلوب العالم التحتاني في نيويورك...من قدراته طبعاً الطعطعة و الحكي الفاظي... كثير من أعدائه مات يا من الخوف يا من الزهق طبعاً... وفي نظره الخارق طبعاً... كان معروف أنّو زلمه حسود من أيّام ما كان في الكرك... و كان ما بحط عينه عشغلة في ايد غيره الاّ خربت و انتعن اساسها... و هاظا كان برظوا من اسباب تركه للكرك و هجرته لعمّان... و ما بنقدر ننسى النَفَس الخارق... أو زي ما احنا بنسمّيها ريحة ثمّو اللّي بتخنق...طبعاً كلّنا بنعرف الأمريكان و قدّيش بحبّو يكون عندهم أبطال... طبعاً صار الزلمة بطير... و صار حليوة و كان في صحفية بتحبّو هاظي كلّها شغلات هوليوود ظافتها... و طبعاً هاظا الحكي كلّوه... من مصدر موثوق جدّاً... جدّاً ... جدّاً...
أنا دايماً بغدركو و بفاجئكوا بالموظوع...بس هيك مزبطة بدها هيك ختم...هيهيهي...
ودمتم...
ROTFL! LOL !!
especially luved the "awwalan" bit.. care to expand the list of differences between u and zuberman ?!! :)
هوا إنت مش عارف إنّو الشو إسمو الأحمر بنعطا كهدية في راس السنة ؟؟
Posted by al 07/16/2006, 16:05:p